पेन फ़क्त २ रुपये..!
हातात जीर्ण झोळी घेऊन
रोज एक म्हातारा
नाक्यावरल्या फ़ुटपाथावर फ़िरत असतो..
स्वत:शीच बडबडत
की...
पेन फ़क्त २ रुपये..!!
चहा पिणा-या
घोळक्यासमोर येऊन
थांबतो
अगतिकपणे आजुबाजुला बघत
आवळलेल्या मुठीमध्ये
असंख्य
पेन घेऊन
पण...
त्याचेच..!
पेन फ़क्त २ रुपये..!!
प्लीज...
असं तो किमान
चार पाच वेळा सांगतो
पण...
मुलींना आपादमस्तक न्याहळताना
फ़िरलेली मान
विस्फ़ारलेले डोळे
त्याला नसतील पहात कदाचित
कान मात्र
ठरवुन बहीरे झालेले पाहीलेत
एकाचवेळी अनेकांचे...
तोही किंचित हसतो
सगळ्यांसोबत
आणि पुन्हा सांगतो की...
पेन फ़क्त २ रुपये..!!
प्लीज...
धिस इज फ़ोर कॆंसर पेशंट्स...फ़ंड...
आणि पुन्हा मागवितात
चहा
अनेकजण अनेकांसाठी
साधा...स्पेशल...
पुन्हा आपल्या मुठीत
चहाचा ग्लास
बोटांत सिगरेट्स
पुन्हा...
मुलींना आपादमस्तक न्याहळताना
फ़िरलेली मान
विस्फ़ारलेले डोळे
त्याला नसतील पहात कदाचित
त्याचेच
पेन
घेऊन जाताना
कान मात्र
ठरवुन बहीरे झालेले पाहीलेत
एकाचवेळी अनेकांचे...
ज्यांनी ऎकलेलं असतं
पेन फ़क्त २ रुपये..!!
प्लीज...
No comments:
Post a Comment